A CANZUNA POPOLARI   Era Settembri e l’aria bella rùci, si priparava a festa ru paisi u mari avanzi a Rriggiu chinu i luci pà festa cchiù randi rà genti Calabrisi.   Murriana i bbuci ‘nchianava p’ammunti e nu grandi fuji-fuji pi la via, ‘nta folla carcunu regulava i cunti stava finendu ddhà jiurnata i carmèria.   Era nu duellu i nà parti a musica ajitanti musica o rumuru non si sapi, spacchiusa e vistuta assai sgargianti sfidava a canzuna popolari.
		I llatra parti cu belli modi i fari llatri sfidanti non si facianu ‘ntimidiri era nu gruppu di strumenti musicali chiddhi rà tradizioni chi non voli muriri.   A musica moderna era cchiù forti mintuta chi volumi tutti jiati, pronta mi cumbatti finu a morti cuntra a muttetti,sturnelli e sirinati.   Chiuvivinu noti moderni i tutti i parti, erunu lami di cuteddhi assai tagghienti, a canzuna popolari difindiva a sorti cu gran curaggiu e stringendu i renti.
	Pà tradizioni si mintiva mali corpu su corpu circava mi rinveni, cuntra a tutti ddhi effetti speciali, circava la so vita mi manteni.   Dissiru all’urtimu chiamandusi ‘ntrà iddhi facimu rota strumenti d’Asprumunti facimunci viriri li spisiddhi e nà vota pi tutti isamula stà frunti.   A tradizioni … a vonnu eliminari, e morti sia …,  ma cu l’onori i l’armi saimu a muriri u vulimu fari mentri cantamu vicinu o  nostru mari.
	I stavunu mmazzandu a ddhi strumenti cù soni, luci e paroli mericàni, si difindiva a tradizioni cu li renti  cà musica moderna non putiva ppattàri.   Ajiti rraggiùni non cià putimu fari cuntra a musica chi mmazza a tradizioni però stasira ‘ndaiti  accuntentàri vulimu sunari pi l’urtima emozioni.   Si sintiu nu lamentu d’organettu e si scappellaru i moderni musicanti mentri rantuliava la pipita…, ‘nci resiru l’onori dilli armi.
	Poi a musica moderna, ca manu supra o pettu, vardau ‘ntà ll’occhi  a chiddha antica, si jisau addritta , muta e cù rispettu sapendu ch’era l’urtimu refulu di vita… Supra o nostru onori vi giuramu nà cosa i chisti nà putimu fari mentri a pianola ‘nci frischiava a batteria: “senza  riddhi non c’erimu mancu jieu e tia   guariti e sunati nostri frati, cuntinuati stà beddha tradizioni tinendu cumpagnia e nnàmurati mi ‘nci scaseddha ‘nto cori l’emozioni,   viddhani,cittadini, marinari e pasturi cardoli, muntanari, paisani e piscaturi non mi spiccia a parrata dialettali è a storia nostra …, a canzuna popolari!”
	Milano 21/05/2009

© I Cumpari Ra Putia - Varese