‘Nto tempu ru Natali



	Currivinu i figghioli ‘nto Natali mi sentunu sunari i ciarameddhi ristavunu ‘ncantati a bucca aperta pariva a nuvena sunata i llangiuleddhi non c’era jiocu chi faciva sfantasiari quantu ddhu sonu chi miscitava l’aria …musica biniritta…senza tempu comu un bicchieri i vinu ‘mbivutu ‘nto parmentu
	u zampugnaru aiva a facci russa mentri sciusciava l’untri i peddhi i crapa chi jirita stuppava tutti i buca e spissu l’occhi arretu rivutava… sciusciava forti mi unchia a ciarameddha si dunduliava o sonu ru strumentu e a llungava sta ruci litania… prima mi si riposa nu mumentu …o ciarameddha chi scindivi d’Asprumunti e giravi paru paru li paisi pi timpi e pi sinteri ti ‘ndi jivi… prima mi porti sonu o me quarteri …oggi non sentu cchiù li zampugnari e non canusciu cchiù lu me quarteri si chiuru l’occhi… chi me capiddhi jianchi… …Si fannu subitu ruci i me pinseri.